Act 17 | PONPDN | STEP | IRA kotin weid nan Ampipolis o Apolonia, ap pwara don Tesalonik, wasa sinakoke en Sus oko mi ia.

Acts 17

1 IRA kotin weid nan Ampipolis o Apolonia, ap pwara don Tesalonik, wasa sinakoke en Sus oko mi ia. 2 Paulus ap kotilon on re ’rail duen a kin wiawia o ian ir kapakaparok pena san kisin likau kan ni ran en sapat silu. 3 A kotin padaki o kasaleda, me Kristus udan kalokolok o iasada san ren me melar akan, o me Iesus men et, me i kawewe on komail, me Kristus. 4 O akai irail me posonla ap waroki on Paulus i Silas, o pil men Krik lelapok me toto, o li saupeidi me kaidin me malaulau. 5 A Sus oko pepeirindar, ap ukada ol sued kai, o kapokon irail pena o kapeida kanim o, o kapil pena im en Iason, pwen wa ira don pokon o. 6 Irail lao so diar ira da re ap waikelon don saumas akan en kanim o Iason o saulan kai indada: Mepukat kamokimo kidadar sappa, nan ira pil pwara dor met. 7 A Iason kasamo ira er, o irail karos kin tiakedi masan en Sisa ni ar katitiki, me dene amen Nanmarki Iesus. 8 Irail ari kamakaradar aramas o saumas akan nan kanim o ni ar ronadar mepukat. 9 Irail lao aleer san ren Iason o me tei kan ar kapwa, re ap kadar ira la. 10 A saulan kan madan kadarala Paulus i Silas ni pon Peroa. Irail lao pwarado, ap kotilon on nan sinakoke en Sus oko. 11 Mepukat me mau san irail nan Tesalonik, pwe re pitipit aleer masan o pereperen kalelapokki kisin likau ni ran karos, ma melel mepukat. 12 Ari, me toto irail posonlar, li o ol en Krik kan kisan saupeidi me toto ian. 13 A men Sus en Tesalonik ko lao roner, me Paulus pil padapadak nan Peroa masan en Kot, irail ap kodo o kamakaradar aramas akan. 14 A saulan kan madan kadarala Paulus, dene a pan kotidila ni oror. A Silas i Timoteus mimieta wasa o. 15 O me pelikid Paulus akan kalua i lel Aten. Irail lao aleer kusoned on Silas o Timoteus, me ira en pitipit ko don i, re ap samalar. 16 A ni en Paulus a kotin auiaui ira nan Aten kupura ap ola ni a masani nan kanim o dikedik en ani rok ia. 17 I ari kotin padaki on Sus oko o me toun kaudok kan nan sinakoke pil wasan net, me a kotin padaki on, me kin pokon pena wasa o ni ran akan karos. 18 A saunpadak en Epikurios o Stoik kai ap akamai on i o akai indada: Da paupaulap men et men inda? O akai indada: Likamata i saunpadak en kot en wai akan aki a padaki on irail ronamau en Iesus o en aramas ar pan maureda. 19 Irail ari ukada i o wai an Areopak indada: Kit sota pan kak ron duen padak kap pot et, me koe kin kaweweda? 20 Pwe kasoi en wai pot, me kom wa don kit, kit ari men weweki duen mepukat. 21 Pwe toun Aten o men wai kan, me mi wasa o, kin sopisokki ar kasokasoi o roneron duen meakaros me kap. 22 A Paulus kotida pon dol en mars masani: Komail ol oko en Aten, i kasauiadar, me komail kin masak kaualap kot likam akan, 23 Pwe ni ai koko sili met, o kilekilaner omail saraui kan, i ap diaradar pei saraui eu, me intinidier poa: Sapwilim en kot me so diarokadar, me komail kin kaudoki on ap sasa i, i me I kin padapadaki on komail. 24 Kot me kotin wiadar sappa o audepa karos i me Kaun en nanlan o sappa, nan a sota kotikot nan im en kaudok kan me aramas wiadar. 25 O sota me kin upaki i p a en aramas likamata a kotin anane meakot; pwe pein i kin kotin nene on karos maur, o asinok o meakaros. 26 O a kotin wiadar wein aramas en sappa karos kaparapar san nta ta ieu, pwen kaukauson nan sap karos, o a kotin kiledier warai o wasan ar kauson. 27 Pwe ren raparapaki Kot, ma ir kak pam o diar i, pwe a sota kin doo san amen amen kitail. 28 Pwe i me kitail kin memaureki, o mokideki, o mimiaki, duen akai omail saunkaul pil indadar: Pwe kis a kitail karos. 29 Ari, ma kitail kisan Kot, kitail ender lamelame, me Kot rason kold, de silper, de takai, de dikedik eu, me aramas lolekon diaradar. 30 Ari, kot kotin kanonama on kitail ni ansaun atail rotorot. A ansau wet a kotin masani on aramas karos, ren kalula wasa karos. 31 Pwe a kotin kileledier ran eu, me a pan kotin kadeika kida sappa Ol amen, me a kotin katororedar ni tiak pun. A iet kilel, me a kotiki on aramas karos: A kotin kaiasadar i san ren me melar akan. 32 Irail lao ronadar duen mauredan me melar akan akai ap lalaue, a akai inda: Se men pur on ron san komui duen met. 33 Paulus ari kotila san re ’rail. 34 A ol akai waroki on i o posonlar. Amen ir Dionisius kisan saunkapun kan; a li amen, me ad a Damaris, o pil akai ian irail.